ရက္ခမောင်မောင် (လေးဝတီ)။ ။ ရက္ခိုင်တိုင်းရင်းသားများတိုးတက်ရေးပါတီ(RNDP) နှင့် ရက္ခိုင်ဒီမိုကရေစီအဖွဲ့ချုပ်(ALD) ရို့ရေ ပါတီတစ်ခုတည်းအဖြစ် ပူးပေါင်းဖို့အတွက် ဆွေးနွေးရေးကော်မတီ ဖွဲ့စည်းကြောင်း လေးဝတီက သတင်းရရှိပါသည်။
ရက္ခိုင်နိုင်ငံရေးပါတီကြီးနှစ်ခုဖြစ်တေ ALD နန့် RNDP ရေ ရက္ခိုင်ပြည်သူလူထုတိ တောင်းဆိုချက်နန့် အညီ လက်တွိ အကောင်အထည်ဖော်ရန် တွိဆုံညိုနှိုင်း ဆွေးနွေးမူတိ အကြိမ်ကြိမ် ပြုလုပ်ခရေလို့ သိရပါသည်။
အဂု တရားဝင် ပါတီကိုယ်စားလှယ်တိနန့် တွိ့ဆုံဆွေးနွေးဖို့ ကော်မတီ ဖွဲ့စည်းထားကြောင်းကို ALD အထွေထွေအတွင်းရေးမှူးချုပ် ဦးအေးသာအောင်က အဂုပိုင် ပြောပြပါသည်။
“ပါတီနှစ်ခု ပူးပေါင်းဆောင်ရွက်လားဖို့အတွက် ဒုဥက္ကဌ ဦးအေးကျော်၊ အတွင်းရေးမှူး မျိုးကျော်၊ ဦးစောမောင်နန့် ဦးထွန်းညိုရို့တိကို ပါတီက တာဝန်ပီးထားရေ။ သူရို့ကို ဆွေးနွေးဖို့တော့ခါ ပါတီက တာဝန်ပီးထားရေ သူရို့တိ အဂု ဆွေးနွေးဂတ်တေကိစ္စကို တစ်ခုလေ့ မသိရသိမ့်။ ယင်းကော်မတီကို ၅ ဦး ကော်မတီနန့် ဖွဲ့စည်းထားရေ။ ယင်းလူတိနန့် ဆက်လက်ဆွေးနွေးလားဖို့ အစီအစိုင် ဟိရေ” လို့ ပြောပြလားပါသည်။
ရက္ခိုင်ဒီမိုကရေစီအဖွဲ့ချုပ်ကို တရားဝင် ပြန်လို့ မှတ်ပုံစိုင်ကပင် ရခိုင်တိုင်းရင်းသားများ တိုးတက်ရေးပါတီက ကြိုဆိုခကြောင်း၊ အဂု လက်ဟိအခြီအနီအရ ပါတီနှစ်ခု တရားဝင် ပူးပေါင်းမှုမဟိသိမ့်ကေ့လည်း ရခိုင်ပြည်နယ်တွင် ဖြစ်ပွါးသော ဆူပူအကြမ်းဖက်မှု အခြေအနေတိ၊ ရက္ခိုင်ပြည်သူလူထုတိ တောင်းဆိုချက်အရ အလွတ်သဘောတွိဆုံမူတိနန့် ဆရာတော် ဦးဥတ္တမနိန့် အခမ်းအနားကိုလည်း ပူးပေါင်းလုပ်ဆောင်ခကတ်ကြောင်း ရခိုင်တိုင်းရင်းသားများ တိုးတက်ရေးပါတီမှ အထွေထွေအတွင်းရေးမှူး ဦးဦးလှစောက ပြောဆိုခပါသည်။
ပါတီနှစ်ခုပေါင်းစည်းရေးအတွက် ပါတီဥက္ကဋ္ဌ အပါအ၀င် အဖွဲ့ဝင် ၅ ဦး ကော်မတီတစ်ခုကို ဖွဲ့စည်းထားပြီးကေ နှစ်ပါတီ ပူးပေါင်းဆောင်ရွက်လားဖို့ ကိစ္စတိကို ယင်းကော်မတီကရာ ဆုံးဖြတ်လားဖို့ဖြစ်ကြောင်း သိရပါသည်။
ရက္ခိုင်နိုင်ငံရေးပါတီကြီး နှစ်ခု ပူးပေါင်းဆောင်ရွက်လားဖို့ ကိစ္စနန့် ဆွေးနွေးပွဲ ရလာဒ်နန့် ပတ်သက်လို့ လေးဝတီက ဆက်လက် မိန်းမြန်းရေခါ ဦးအေးသာအောင်က “အမျိုးသားညီညွတ်ရေးအတွက် လုပ်စော်ရာ။ အကောင်းဖက်ကို မျှော်လင့်ရေ။ ယင်း ကော်မတီဝင် ၅ ယောက်ကို ပါတီကိုယ်စား တာဝန်ပီးထားစော်။ သူရို့တိကရာ ဆက်လက် ဆွေးနွေးလားဖို့ ဖြစ်တေ” လို့ ဆက်လက်ပြောပြလားပါသည်။
ယင်း ရက္ခိုင်ပါတီနှစ်ခုရေ ၂၀၁၅ ရွေးကောက်ပွဲမတိုင်ခင် ပါတီတစ်ခုတည်းအဖြစ် ပေါင်းစည်းလားဖို့ ရက္ခိုင်ပြည်သူတိဆန္ဒအရ ဆွေးနွေးနိန်ဂတ်စော် ဖြစ်ကြောင်းသိရပါသည်။
ရက္ခိုင်ဒီမိုကရေစီအဖွဲ့ချုပ်သည် ၁၉၉၀ ရွေးကောက်ပွဲတွင် တနိုင်ငံ တတိယ မဲအများဆုံးနန့် အနိုင်ရခရေ ပါတီတစ်ခု ဖြစ်ခပြီးကေ ပါတီဖျက်သိမ်းခံခြင်း ခံရပနာ၂၀၁၂ ဧပြီလတွင် ပြန်လို့ ပါတီမှတ်ပုံရာ တရားဝင်ပါတီအဖြစ် ရပ်တည်နိန်ရေ ရက္ခိုင်နိုင်ငံရေးပါတီကြီး တစ်ခု ဖြစ်ပါသည်။
ရက္ခိုင်တိုင်းရင်းသားများ တိုးတက်ရေးပါတီရေ ၂၀၁၀ ရွေးကောက်ပွဲတွင် ပါဝင်ယှဉ်ပြိုင်ခပြီးကေ ရခိုင်ပြည်နယ်အတွင်း မဲအများဆုံးဖြင့် အနိုင်ရခရေ ပါတီတစ်ခုလည်း ဖြစ်ပါသည်။
ရက္ခိုင်အမျိုးသားညီညွတ်ရေးအတွက် ပြည်တွင်းက တရားဝင်ပါတီကြီးနှစ်ပါတီ တွိ့ဆုံညိုနှိုင်း ဆွေးနွေးမူတိ လုပ်ဆောင်နိန်ကြောင်း သတင်းရဟိပါသည်။
No comments:
Post a Comment